رم - بقلم : الدكتـور عُدي تركي الفواعير

الأردن مش مجرد أرض عايشين عليها. الأردن هو بيتنا الكبير اللي بيجمعنا كلنا. فيه أهلنا وذكرياتنا وأحلامنا وعلى ترابه تربينا وكبرنا ومنه تعلمنا معنى الانتماء والوفاء وكيف يكون حب الوطن جزء من حياتنا ومن قلوبنا.

كلنا أردنيون من كل الأصول والعشائر والأطياف ومن المدن والقرى والأرياف والبوادي والمخيمات ومن الشمال للجنوب ومن الشرق للغرب. كلنا أهل وإخوة يجمعنا وطن واحد وراية واحدة وقيادة هاشمية بنعتز فيها وبنلتف حولها وما في إشي أغلى من الأردن ولا أقوى من محبتنا إله.

مهما اختلفت عاداتنا وتقاليدنا ومناطقنا بنبقى إخوة وأبناء وطن واحد. دمنا واحد ومصيرنا واحد واللي بيجمعنا أكبر بكثير من أي اختلاف ممكن يصير بيننا لأن الأردن هو بيتنا كلنا وكل أردني فيه هو أخ وسند لأخوه الأردني.

ومن هون بتبدأ مسؤوليتنا تجاه أولادنا وأطفالنا إننا نزرع في قلوبهم حب الوطن وحب بعضنا البعض ونربيهم على المحبة والمودة والاحترام ونعلمهم إنه الأردني أخو الأردني وإنه ما في فرق بين ابن مدينة وابن قرية أو بادية أو مخيم لأننا كلنا أبناء هالأرض وكلنا إلنا فيها حكاية وانتماء.

خلينا نربي أولادنا على إنه الاعتزاز بالعشيرة والأصل والمنطقة إشي بنفتخر فيه لكن الأردن بيظل المظلة اللي بتجمعنا كلنا. نعلمهم يحبوا بعض ويحترموا بعض ويوقفوا مع بعض بالفرح والشدة ويعرفوا إنه قوة الوطن من قوة أهله ومحبتهم لبعض.

حب الوطن مش بس كلام بنحكيه أو شعارات بنرفعها. حب الوطن مواقف وأفعال وإنك تحترم أخوك الأردني وتحافظ على كرامته وتوقف معه وقت حاجته. حب الوطن إننا نزرع المحبة بدل الفرقة والتسامح بدل الخلاف ونخلي قلوبنا مفتوحة لبعض مهما اختلفت آراؤنا أو ظروفنا.

الأردن بستاهل منا نكون إيد وحدة وقلب واحد ونحافظ على هالمحبة ونورثها لأولادنا جيل بعد جيل. وعلينا كمان نربي أولادنا على حب الوطن وحب القيادة الهاشمية والوفاء إلها ونغرس في قلوبهم حب السلام والمحبة والأخوة بين جميع الأردنيين. بدنا أولادنا يكبروا وهم عارفين إنه الأردن بيتهم الكبير وإنه كل أردني فيه أهلهم وإنه أجمل إشي ممكن نتركه إلهم مش بس وطن آمن ومستقر بل وطن أهله بحبوا بعض وبيوقفوا مع بعض وبيعيشوا بمحبة وسلام تحت راية قيادتنا الهاشمية.

حفظ الله الأردن وقيادته وشعبه وحفظ تراب هالوطن الغالي وأدام عليه الأمن والأمان والاستقرار في ظل حضرة صاحب الجلالة الهاشمية الملك عبد الله الثاني ابن الحسين وولي عهده الأمين سمو الأمير الحسين بن عبد الله الثاني. وأدام المحبة والأخوة بين الأردنيين وخلّانا دايماً أسرة أردنية واحدة يجمعها حب الوطن والوفاء لقيادته الهاشمية.

عدد المشاهدات : (3964)