رم -

فارس كرامة

في فنجان قهوة جديد مع دولة الرئيس، بنقعد على رواق، وبنفتح حكي من اللي صار بحاجة إلى مصارحة أكثر من المجاملة، ووقفة تستحق التفكير قبل ما يفوت الأوان، وحديثنا اليوم عن عالم مؤثري السوشال ميديا، عالم صار فيه عدد المتابعين أحيانا أهم من الخبرة، والمشاهدات أعلى قيمة من الرسالة، والشهرة بوابة للمناسبات الرسمية والتكريمات، فهل كل مشهور يستحق أن يكون واجهة للأردن، وهل صار المليون متابع شهادة وطنية.

يا دولة الرئيس، شكلنا بحاجة لوقفة جدية مع بعض مؤثري السوشال ميديا، اللي صار تأثيرهم على عادات المجتمع أكبر من قيمة المحتوى اللي بقدموه، اليوم في ناس كل شطارتها تستعرض كم صرفت، شو اشترت، وين تعشت وبأي فندق نزلت، وكأن النجاح صار بعدد الشنط والمطاعم والفواتير، والمشكلة إن المواطن صار يحاول يقلد حياة افتراضية، على حساب راتب حقيقي مش مكفيه لآخر الشهر.

والأخطر إن المحتوى تجاوز الاستعراض إلى ترويج سلوكيات دخيلة، واستعراض جرائم وسرقات، وإساءات للمهن وأصحاب الاختصاص، وكأننا أمام سباق، كل ما نزل مستوى المحتوى ارتفعت المشاهدات، وهون لازم يكون في تشريعات واضحة وسريعة تضبط المحتوى الهابط، وتحاسب على الإساءة والتشهير والتحريض، وتحمي المجتمع، من دون المساس بحرية التعبير.

لكن يا دولة الرئيس، ما بدنا الحكومة يكون إلها دور في صناعة هاي الظاهرة، مين أقنع بعض المؤسسات الرسمية إن عدد المتابعين صار مؤهل للتكريم والدعوات والرحلات والامتيازات، مش غلط نستفيد من المؤثرين بالترويج للسياحة والاستثمار، لكن الغلط نخلط بين الشهرة والقيمة، وبين الانتشار والمسؤولية الوطنية، والأغرب إن بعض أصحاب المنصات المليونية اللي بنشوفهم في كل فعالية رسمية، غابوا تماما لما احتاجهم الوطن في قضايا وأزمات حساسة، وكأن الوطنية مش داخلة ضمن جدول الإعلانات، أو يمكن ما عليها مشاهدات كفاية.

وإيقاف تيك توك كان خطوة جيدة، لكن المحتوى ما بوقف عند تطبيق، انتقل لإنستغرام وسناب شات، وبكرا لمنصة ثانية، يعني مش معقول نظل نطارد التطبيقات ونترك المحتوى.

وبالمقابل، وين الإعلام الأردني من كل هالمشهد، ليش بنركض وراء مؤثر عنده مليون متابع، وبننسى مؤسسات إعلامية عندها عشرات السنين من الخبرة والمهنية، ووقفت مع الوطن في أصعب الظروف، المطلوب إعادة الاعتبار للإعلام الوطني، وتطوير الإعلام الرسمي، بدل ما يصير عداد المتابعين أهم من تاريخ المؤسسة، والمشاهدات أهم من الرسالة.

يا دولة الرئيس، إحنا مش ضد المؤثرين، لكن ضد تحويل الشهرة إلى شهادة حسن سلوك، وعدد المتابعين إلى جواز مرور للمناسبات والتكريمات، مش كل واحد عنده مليون متابع صار مؤهلا يمثل الأردن، ومش كل من صور أكله وشربه صار خبير سياحة وإعلام.

باختصار، بدنا نفرق بين اللي بصنع محتوى واللي بصنع قيمة، فالأردن مش إعلان سياحي، والوطنية مش رحلة مجانية، والشهرة مش شهادة وطنية.

عدد المشاهدات : (4999)