كامل النصيرات

حدثني صديقي عن (ابن الحرام) الذي ساق سيارته برعونة وكاد أن يتسبب بحادث معه..قلتُ له : وما أدراك أنه (ابن حرام) ؟ فقال لي بعصبيّة :والله انه ابن حرام ولو مش ابن حرام ما يعمل هيك ..!
قال لي صديق آخر ونحن نتناقش عن التصرفات السلبية في المجتمع : يا زلمة الاسبوع الماضي شفتلك واحد (ابن حرام) قطع الاشارة حمرا وما صبر دقيقة لتفتح..! قلت له : وشو عرفك أنه ابن حرام ..؟ قال لي ضاحكاً : وليش في (ابن حلال ) يعمل هيك ..؟!

صديق لصديقي ؛ الدكنجي خربط معه بدينار ..فقال لصديقه : هاظ الدكنجي ابن حرام ..! ولما اعترضت: شو عرفك ؟ عصّب أيضاً وقال لي : يا زلمه من شكله مبيّن ابن حرام ..!

وصف (ابن حرام) ازداد في الآونة الأخيرة بشكل يعبّر عن ضيق الاردنيين بكل شيء ..صار وصفاً مجانيّاً لكل من يستفزّهم ..و الأدهى و الأمر أنهم يصرّون عليه و يبررونه لكي يثبتوه ..! فإثباتات أن فلاناً ابن حرام : تصرّفه في أي موقف ..شكله يقول أنه ابن حرام ..طريقة لبسه تحكيلك انه ابن حرام ..اصراره انه ما يمشّي المعاملة إلا بعد توقيعها من فلان ..ركّزْ في نظرات عيونه ؛ تعرف أنه ابن حرام .. اسلوبه اسلوب واحد ابن حرام ..ما بعمل هيك إلا ابن الحرام ..وهكذا دواليك..!

مرحى للأردنيين ..فهم ليسوا بحاجة لعلم الجينات ..وليسوا مضطرين للذهاب لمختبرات (دي إن إيه DNA ) ..فهم يفهمون بالفراسة ابن الحرام من غيره ..من نظرتك ..من حركتك ..من ردّك ..من ابتسامتك ..من لوية بوزك ..من تسريحة شعرك ..من لون قميصك ..من تخبيصك ..!
اغلقوا مختبرات (دي إن ايه) في العالم كلها و شغلوا الأردنيين بدلاً منها ..فهم يعطونكم النتيجة بخمس ثوانٍ و أقل ..!!