ديموقراطية من الاخر .. انا بعرف انه هاي الديمقراطية موجودة في امريكا ويقولوا انها امها .. لكن مين ابو الديموقراطية اكيد الانجليز .. وانا بحب اشوف افلام الامريكان خاصة البوليسية وبشوف كيف الشرطي لما بمسك المجرم شو بساوي فيه اي بعد ما يضربوه ويطعجه انياعه في جملة بحكوها ضليت اسمع عنها لما احفظتها وهيه (انت مقبوض عليك واي كلمة ابتحيكها محسوبة عليك واذا بتوكل محامي ما عندنا مانع) وهو ما بساوي هاظا المجرم الا سكت واحيانا بضربوه اذا سكت احنا عندنا غير - المجرم بضرب وبسبب وبعلن وبالاخر بصير الحق على الشرطي والمسؤولين بدال ما يدافعوا عن زميلهم او اللي  هوه عبد مأمور الهم بكل بساطة يا بحبسوه يا برمجوه واللي بكسب المجرم وبصير بده مستشفى على حساب الشرطة لكن ما فينا واحد سأل سؤال فيه واحد قاعد ابيته واجت الشرطة عليه واخذته. الشرطة يا احنا بنروح عليها وبنشتكي يا احنا بساوي شك بدون رصيد وما بندفع حقه وفيه نوع ثاني اللي همه حميلت المواس والشفرات هظول .. ما عندهم يمه ارحميني يا بضربوا بعضهم وبحكوا انهم الشرطة ضربوهم يا بضربوا الشرطة وبقولوا الشرطة ضربتهم. زمان رحت على قرايبي على عمان .. وكانوا ساكنين في (خنيفسة) اللي هيه اليوم الهاشمي الشمالي وكان فيها ضابط اسمه شكيب ابو الهيجا وعريف اسمه خلف (ابو محمود) وشرطي اسمه عبدالرحيم وكانوا الكل بحبهم وبحترمهم وعمرهم اهل خنيفسة ما سكروا باب وكان خلف بصفر بالليل .. وهو بآخر الهاشمي يرد عليه بالصفيرة عبدالرحيم الشرطي من مخيم المحطة بصفيرة ويروحوا وكانوا هظول الثلاثة همه مسؤولي الشرطة على الهاشمي ومخيم المحطة وماركا ..
وعلى دلعونا على دلعونا من الديمقراطية لا تحرمونا.